ದೊಡ್ಡೋರಲ್ಲ

ವಯಸ್ ಆಗಿದ್ಕೆ ದೊಡ್ಡೋರಲ್ಲ

ಇರಬೇಕ್ ತಲೇಲ್ ಬುದ್ದಿ !
ದೇವ್ರೂ ಕೂಡ ಸುಸ್ತಾದ್ನಲ್ಲ
ಸಾಕಾಯ್ತ್ ಅವ್ನ್ಗೂ ತಿದ್ದಿ !!

ಬದುಕು ಮಾಯೆಯ ಆಟ

ಬಿಸಿಲು ಕುದುರೆಯ ಬೆನ್ನು ಹತ್ತಿದ ಓಟ!

ಮಾಯಾ ಜಿಂಕೆಯೇ ಬೇಕೆಂಬ ಹುಂಬ ಹಠ!

ತಲೆಮಾರುಗಳಿಂದಲೂ ಇದೇ ಪರಿಪಾಠ!
ಇನ್ನಾದರೂ ನಿಲ್ಲಲಿ ಈ ಹುಚ್ಚಾಟ!

ಕಲಿ ಜೀವನದ ಪಾಠ..

ಬದುಕು ಮಾಯೆಯ ಆಟ!!

ಕನಸು

ಸಾಲು ಸಾಲು ಕನಸುಗಳು, ಮೆರವಣಿಗೆಯಲಿ ಬಂದಿದೆ

ಮನದ ಕನಸಿನೂರಿನೊಳಗೆ ಪ್ರವೇಶ ಕೋರಿ ಕಾದಿವೆ

ಚಿಕ್ಕ ಕನಸು, ದೊಡ್ಡ ಕನಸು, ಮುರಿದ ಕನಸು, ಮರೆತ ಕನಸು

ಎಲ್ಲವು ಬಾಗಿಲಲ್ಲೇ ನಿಂತಿವೆ, ಪ್ರವೇಶ ಕೋರಿ ಕಾದಿವೆ

ಅರ್ಹತೆಯ ಚೀಟಿಯನ್ನು ಎಲ್ಲ ಕನಸು ನೀಡಿವೆ
ಎಲ್ಲವು ಹಿತವಾಗಿರಲು ಆಯ್ಕೆ ಕಷ್ಟವಾಗಿದೆ

ಒಂದು ಹೆಚ್ಚು ಒಂದು ಕಡಿಮೆ ಎಂಬ ಭೇದವೇತಕೆ
ಎಲ್ಲ ಕನಸು ನನ್ನವೇ - ತಾರತಮ್ಯ ಸಾಧ್ಯವೇ?

ನನ್ನ ಕನಸಿನೂರಿಗೆ ಪ್ರವೇಶ ಮುಕ್ತವಾಗಿದೆ !!
ಎಲ್ಲ ಕನಸು ಹೊತ್ತುಕೊಂಡು ಮುಂದೆ ಸಾಗಬೇಕಿದೆ!!

ಕ್ಲಿಷ್ಟ

ಮುನ್ನುಡಿ, ಬೆನ್ನುಡಿ, ಚೆನ್ನುಡಿ, ನಾಣ್ಣುಡಿ
ಪ್ರಪಾತ, ದಿಗಂತ, ಅನಂತ, ಏಕಾಂತ
ಕೆಚ್ಚೆದೆ, ಕಾರ್ಮುಗಿಲು, ಕಗ್ಗತ್ತಲು, ಕಂಗಾಲು
-ಇಂಥ ಕ್ಲಿಷ್ಟ ಪದಗಳ ಬಳಸದೆ ಬರೆದ ಕವನ..

ಇಷ್ಟ ಆದ್ರೆ ಮತ್ತೆ ಓದಿಬಿಡಿ
ಇಲ್ಲದಿದ್ರೆ ನಕ್ಕು ಮುಂದೆ ನಡಿ!

ಛಲೋ

ನನ್ನದೊಂದು ವಿನಂತಿ
ಎಲ್ಲದಕ್ಕೂ ಯಾಕ್ 'ಹೂಂ' ಅಂತಿ?
ಇಲ್ಲ ಅನ್ನೋದ್ ಯಾವಾಗ್ ಕಲೀತಿ
-ಆಗ್ ನಿನ್ ಬಾಳು ಛಲೋ ಆಗ್ತೈತಿ!!

ನಾನಂದ್ರೆ ನಂಗಿಷ್ಟ

ಏನೇ ಗೆದ್ದರೂ, ಎಷ್ಟೇ ಸೋತರೂ,
ಏನೆಲ್ಲಾ ಪಡೆದರೂ, ಎಲ್ಲ ಕಳೆದರೂ,
ಯಾರೇ ಬಂದರೂ, ಎಲ್ಲ ಹೋದರೂ,
ಒಂದಂತು ಸ್ಪಷ್ಟ..ನಾನಂದ್ರೆ ನಂಗಿಷ್ಟ !!

ಕವನ?

ಚಟ್ನಿ ಪುಡಿ ಖಾರದ ಪುಡಿ..
ಅನ್ನದ ಜೊತೆ ಕಲಸಿಬಿಡಿ..
ಖಾರ ಆದ್ರೆ ನೀರು ಕುಡಿ..
ಊಟ ಆಯಿತು ಮಲಗು ನಡಿ..

ಇದೂ ಒಂದು ಕವನ?
ಬರೆಯಬಾರದು ಇಂಥವನ್ನ!!